វាជារឿងចំលែកបន្តិចដែល Apple នឹងលក់ MacBook Air ទំហំ ១៣ អ៊ីញនិង MacBook Pro ទំហំ ១៣ អ៊ីញក្នុងពេលដំណាលគ្នា ដោយកុំព្យូទ័រយួរដៃស៊េរីថ្មី ៩៩៩ ដុល្លារនិង ១,២៩៩ ដុល្លាររបស់ Apple ទំាងនេះហាក់ដូចជាស្រដៀងគ្នាខ្លាំង ក្រៅតែពីស៊ុមជុំវិញរបស់វាដែលមានភាពខុសគ្នាខ្លះតែប៉ុណ្ណោះ។
យ៉ាងណាមិញ កុំព្យូទ័រយួរដៃទាំងនេះមានប្រព័ន្ធដំណើរការ M1 ដូចគ្នា, អង្គចងចាំនិងជម្រើសផ្ទុកដូចគ្នា, រន្ធដោតដូចគ្នានិងអេក្រង់ក៏ស្រដៀងគ្នាផងដែរ។ ក៏ប៉ុន្តែបើយោងទៅតាម theverge.com បានលើកឡើងថា ភាពខុសគ្នាធំបំផុតរបស់ MacBook Air និង MacBook Pro គឺកង្ហារ។ MacBook Pro មានកង្ហារត្រជាក់សម្រាប់ស្រូបនឹងបញ្ចេញខ្យល់ក្តៅចេញពីកុំព្យូទ័រ រីឯ MacBook Air វិញគឺគ្មានកង្ហារនោះទេ ដែលនេះវាអាចបង្ហាញពីភាពខុសគ្នាដ៏ធំទៅលើ Performance របស់កុំព្យូទ័រ។ មានន័យថា CPUs នៅក្នុងកុំព្យូទ័រអាចដំណើរការក្នុងល្បឿនលឿនបាន លុះតែវាមិនឆាប់ក្តៅ ឬមិនមានកម្តៅខ្លំាងពេលកំពុងប្រើប្រាស់ ដោយសារតែកង្ហារនៅខាងក្នុងបានផ្តល់ភាពត្រជាក់ដល់CPUsនោះ។
បើតាមការបញ្ចាក់របស់ក្រុមហ៊ុន Apple កុំព្យូទ័រនីមួយៗសុទ្ធតែមាន processor ដូចគ្នា ដែលអាចដំណើរការក្នុងល្បឿនដូចគ្នា ប៉ុន្តែកង្ហារនៅក្នុង MacBook Pro និង Mac mini អាចឱ្យវារក្សាដំណើរការបានល្អនិងយូរជាង។
